GÆFUSPOR
Krabbameinsfélag Akureyrar og nágrennis hvetur alla til þess að taka gæfuspor í eigin lífi í maí! Við kynnum einföld skref sem draga m.a. úr líkum á því að greinast með krabbamein auk þess að vera heilsubót og létta lund! Allir geta tekið þátt á sínum forsendum og með því að bæta til hins betra frá daglegum venjum með litlum gæfusporum ert þú á réttri leið! Hvaða gæfuspor ætlar þú að taka?
HREYFING
Reglubundin hreyfing dregur úr líkum á krabbameinum auk þess sem hreyfing er til góðs fyrir fólk sem hefur greinst með krabbamein. Hreyfing hefur jákvæð áhrif á hormónajafnvægi líkamans, minnkar bólgumyndun og hraðar ferð fæðunnar í gegnum meltingarveginn. Við mælum með minnst 30 mínútna hreyfingu á dag og leggjum til einfaldar leiðir til að bæta við hreyfingu í daglegt líf:
- Létt ganga í Kjarnaskógi eða í hverfinu þínu
- Sitjandi æfingar á stól fyrir þá sem eiga erfitt með gang
- Vinna í garðinum
- Ganga eða hjóla til og frá vinnu
- Taka tröppurnar í stað lyftu
- Leggja lengra frá matvöruversluninni
Hver og einn metur sína getu, en við hvetjum alla til að taka gæfuspor með hreyfingu.
MATARÆÐI
Hollt mataræði felur í sér hæfilegt magn af fjölbreyttum fæðutegundum sem veita alla þá orku og næringarefni sem líkaminn þarf á að halda. Tillaga að bættu mataræði:
- Velja oftar heilkornavörur, fisk, baunir og linsur, ávexti og grænmeti
- Vera dugleg að drekka vatn
- Velja hollari kostinn
- Borða hægar og njóta matarins
LÍKAMI OG SÁL
Það er mikilvægt að huga að líkama og sál, hér eru nokkrar tillögur um einföld gæfuspor:
- Sofðu rótt! Svefn gefur líkamanum tækifæri til að hvílast og endurnærast, sem styrkir ónæmis- og taugakerfi hans. Mælt er með 7-8 tíma svefni á sólahring fyrir fullorðna einstaklinga.
- Notaðu sólavörn til að verjast geislum sólarinnar og minnkaðu um leið líkur á húðkrabbameini
- Andaðu! öndunaræfingar og líkamsslökun hjálpa þér að slaka á taugakerfinu og stuðla að jafnvægi og vellíðan.
- Taktu frá tíma í dagsins önn til að sinna áhugamálum þínum, til dæmis með lestri góðrar bókar, handavinnu, fluguhnýtingum eða hvað það sem gleður andann.
- Hugaðu að þeim sem standa þér næst, ræktaðu vinasambönd, hringdu símtalið, haltu matarboð, skildu eftir smá glaðning á dyraþrepi.
- Líttu við! Hefur þú eða einhver nákominn þér greinst með krabbamein? Þitt gæfuspor gæti verið að líta við í heimsókn til okkar, við bjóðum upp á jafningjastuðning, viðtöl í ráðgjafajónustunni, öflugt hópastarf og gagnleg námskeið. Svo er kaffið líka gott!
TÉKKAÐU Á ÞÉR
Með mánaðarlegri sjálfsskoðun eykur þú líkur til þess að uppgötva krabbamein snemma. Taktu gæfuspor og þreifaðu brjóstin/eistun reglulega!
- Einkenni brjóstakrabbameina
- Einkenni eistnakrabbameina
- Við hvetjum karlmenn auk þess til þess að vera vakandi fyrir blöðruhálskirtilskrabbameini
- Yfirlit yfir önnur krabbamein
VERTU MEÐ!
Með því að velja þér gæfuspor ertu strax orðin þátttakandi! Þú getur skrifað þín gæfuspor á blað sem einskonar áminningu og sett þér það markmið að gera það að daglegri venju. Þú getur einnig skorað á vini og vandamenn að kynna sér gæfusporin og taka þátt, sjá facebook síðu félagsins.
ÞITT FRAMLAG SKIPTIR MÁLI!
Starf Krabbameinsfélags Akureyrar og Nágrennis byggist alfarið á stuðningi einstaklinga og fyrirtækja. Hjálpaðu okkur að standa vörð um krabbameinsgreinda og aðstandendur þeirra með því að leggja okkur lið. Sjá hér